Die maklike, altyd betroubare vangnet vir enige geleentheid…
Mens het mos maar altyd daardie resep wat jy uitpluk wanneer nood druk… Of as jy sommer lus is vir iets lekkers maar nie genoeg om te veel moeite te done nie. Ek het so brosbrood resep! En die lekker ding van brosbrood is jy kan hom optof volgens die geleentheid. Doop hom in sjokolade of gegeurde suiker en dis ’n hele ander koekie! Of geur hom om te pas by dit wat glas nie so bros nie… maar anders is die keuses legio! Hier is hy:
Beskuitpan brosbrood
Bestanddele:
250g KOUE botter
160g strooisuiker, gesif
225g koekmeel, gesif
100g aartappelmeel, gesif
Gerasperde skil van 1 lemoen
Omtrent 2 takkies se tiemieblare
Kakaopoeier vir oorsif
Metode:
Voer jou beskuitpan uit met bakpapier.
- Gooi al die bestanddele - behalwe die kakao, in ’n voedselverwerker en meng totdat deeg net-net begin vorm. ONTHOU, moenie oormeng nie.
- Plaas in voorbereide beskuitpan en smeer plat met die agterkant van ’n lepel.
- Merk liggies met beskuitrooster - dit hoef nie regdeur te druk nie.
- Plaas in yskas vir 15 minute, of totdat die Oond warm is.
- Voorverhit die oond na 180℃.
- Bak vir 25 minute, haal vinnig uit en druk rooster in om deur te sny of gebruil pizzasnyer om netjies in stukkies te sny.
- Plaas weer in oond en bak vir 15 - 20 minute tot goudbruin.
- Haal uit en laat afkoel.
- 10.Sif kakao oor met opdiening.
NOTA:
In plaas van die lemoen en tiemie kan jy ander geure gebruik, soos laventel, roosmary en vanielje, die opsies is joune!
Jy kan ook die aartappelmeel met rysmeel of selfs mielieblom vervang - ek vind net die aartappelmeel werk die beste.
